Wednesday, November 28, 2007

بيع بعض ممتلكات ابو العربى


بسبب رفضى حضور مؤتمر انابوليس اعانى من ضائقه ماليه

بس مش مشكله والله مفرط فى فلسطين

ومتفوضش على حقى

الحق ميجيش الا بدراع

يلا نصيب

صورة لابوالعربى اثناء عمليه البناء

شقه 75 متر على سطح القمر دور ارضى بدون تشطيب ذى بتاعت اسكان الشباب


تطل على مصر ام الدنيا فوق قصر الرئاسه مباشره

يعنى توف برحتك

سهله المواصلات عقد تمليك من وكاله ناسا

للجدين فقط


تنين بحاله جيده استعمال ابوالعربى احسن من استعمال طبيب

كنت فاتح بيه ورشه حداده فى العصر الحجرى
بخ نار بمقياس فهرنهيت 100 درجه مأويه

نباتى غير مكلف بالمره

يصلح لكل الاعمال

للاخوة العرب الاستعلام والاستفسار

مدونه ايامنا الحلوة


الكلاب الصهاينه والمطبعين العملاء يمتنعون

Monday, July 23, 2007

كليوبترا وسمعه مصر

وطيه وطيه


اه فكرتونى بالذى مضى



انا هحكيلكم على كليوبترا بنت عم بطليموس الله يرحمه


لما مات الحج بطليموس ده البت كليوبترا كان عندها 17 سنه بس كانت موزة قوى

وكان احمس صحبى بيحبها جدااا بس هى كانت مديالو وش خشب

وفى مره من المرات اعد انا واحمس فوق معبد من المعابد وبندخن شوفنا عيل روش راكب حصان مستورد وبيلف حولين بيت كليوبترا قالى احمس شوفت ياعم اهو عيل امه جيباله حصان وبيروش وبصينا لقينا الواد ركن الحصان ووقف على صخره عليا وطلع مرايه حديثه بايد وفضل يلاغى فى كليوبترا لقيت احمس دمه فار وقالى كل الناس بقى معاها مرايات ياعم الحج وراح نازل من على المعبد وراكب الكريته

الاسبور بتاعته ( كان معاه كريته بحصان واحد وعجلتين تحفه ) وطلع يجرى ع الواد... الواد شافه راح خالع
راح رايح لكيلوبترا وقالها مينفعش تقفى كده راحت قيلالو وانت مالك انت يا احمس هو انت هتحكمنى ولا انت ولى امرى
ومنسعتها احمس معتش احمس الى انا اعرفه
يجى دورى انا عرفت انها على علاقه بيليوس قيصر مقدرتش امسك نفسى وكل كتب التاريخ بتقول انهم انتحرو هاؤؤ ال انتحرو قال
انا الى قتلتهم عشان اغسل عارك يا مصر
وانا الى عملت مصنع كليوبترا عشان كل واحد يشرب سيجارة من العلبه دى يشتم فى كليوبترا
يخربيت ام دى سيجاره مكتومه ومنفسه واقذر سيجارة عرفها بنى البشر
وخدو بالكم م التاريخ احسن بيزوروة



Saturday, July 7, 2007

استقلال بورسعيد الجزء 2
عارفين ليه انا فكرت فى الاستقلال واذاى جت الفكره وامتى
انا كنت سبت بورسعيد وهجرت بعد مشاكل مع الملك سونسرت الثالث والخلافات الى نشأت بينى وبين الاسره الثانيه عشر
عشان مرضاش يعملى هرم باسمى الناقص
وطبعا هتقول انى هربت من البلد هقولك لا يا حبيبى انا مرضتش اعمل حاجة معاه عشان كان صحبى واكلين عيش وملح مع بعض
ومش هرم الى يوقع بنا
المهم لافيت العالم ورجعت لقيتهم عملو قناه السويس والبلد اشتغلت وكده فرحت فى الاول وبعدين لقيت الشعب تعبان والملك ناهب البلد هو والحشيه قولت لا خلاص بقى مبدهاش اعمل حاجة يا ابو العربى وبداءت بالفعل فى اعداد خطه الانفصال
ولكن ياسلام عليا وانا بقول و لكن زعيم والله
سنه 1952 بليل حصل الى حصل والصبح جالى الزعيم خالد الذكر الرئيس جمال عبد الناصر
وقلى يا عرب بلاش ياعرب احنا ولاد البلد دى والبلد دى هتتغير
قولت يعنى ايه البلد هيحكمها اهلها وهترجع تانى لينا
وقلى كمان فى مفاجاه هنخلى بورسعيد منطقه حره
وبعدين فرحت بالثورة وبانجازات الثورة
وشلت الموضوع من دماغى
لحد ماااااااااااااا خلااااااااااااص
تعبت وجبت اخرى من الى بالى بالكم
ربنا يريحنا منه
وانتظرو الجزء الثالث

Monday, June 25, 2007

انما للصبر حدود.......استقلال بورسعيد الجزء الاول




انما للصبر حدود انا خلاص جبت اخرى من النظام ده وتعبت بقى ومحدش يلومنى

انا رجعت تانى افكر فى استقلال مدينه بورسعيد واعلنها من طرف واحد دوله حره مستقله




عندنا موارد بصلاه ع النبى ( صيد غاز زراعه صناعه

ميناء للتصدير

لغه مختلفه عن باقى المحافظات

حدود مرسومه ومحكومه كانو عملنها عشان التهريب

يبقى من حقنا نعمل دوله



مش هو قطع عشنا ولغى المنطقه الحره وخلانى قفلت الفرش بتاعى

و دمر شباب بورسعيد طيب وحيات امى لوريه


وطبعا هنقطع علقتنا مع الكيان الصهيونى وهنعمل اكتفاء ذاتى وهنحقق احلامنا الى النظام مش عيزها تقوم


وطبعا مش طمع منى فى الرئاسه

بس ده واجب الشعب عليا

ابقى الرئيس واتحمل المسؤوليه

والا يبقى شعب معندوش دم

ولا ايه

وانتظرو بقيت الاجزاء

Sunday, June 10, 2007

العلاقات الروسيه الامريكيه البورسعيديه


قشطه يا رجاله وقشطه يابنات عشان متزعلوش

والله كنت مشغول شويه عشان موضوع قمه التسعه او ذى ما انتم عرفين الا ايه ( قمه الثمانيه ) كنت بحاول اهدى النفوس بين روسيا وامريكا ( هائوأو الا ايه بهدى النفوس ) دة انا ولعت الدنيا يا جدعان

اروح لبوش وقوله ايه ده الواد بوتين ده بيعملك وحش قوى هو مش عارف ان انت جامد وان امريكا هى القطب الواحد دلوقت وبيهدد انه هيوجه صواريخه على امريكا وانت( ساكت )لا ياعم ميصحش كدة بقى شكلك وحش قدام الناس

وروح جارى على( بوتين) وقولو ايه ياعم دة الواد بوش دة ولا عملك اعتبار ولا لروسيا اعتبار وعمال طايح يمين وشمال وانا بامنه الله خايف على روسيا عايز يعمل درع صاروخى الا ايه عشان كوريا الشماليه( وايران) لا يمعلم دة عشانك انت وعمال يقول عيزين ديمقراطيه فى روسيا طب هو مال اهله لا( متسكتش) ميصحش كدة

ايه رايكم احنا عيزينها حرب كدة بصلاه على النبى ( الهم اوقع الظالمين فى الظالمين واخرجنا من بين ايديهم
سالمين ) بس ايه ولعين من بعض واخوكم ابو العربى هو السبب واى خدمه يا عرب

خليكم كدة نصيبه تخدكم ملكمش لزمه فى العالم
وانا الى طالع عين امى
من امريكا لروسيا
يا قلبى لا تحزن
قصدى العرب طبعا

Sunday, June 3, 2007

حجات عملتها وتنسبت لغيرى

انا عشان بحبكم هعرفكم اسرار محدش على وجه الارض يعرفها ومش عيزين تسييح
من هو اول رجل صعد القمر ؟؟؟ يا عبيط متقولش متقولش( يورى جاجارين) اول معرفش وخلاص ولا لازم تفتى بصلاه على النبى انا اول واحد حط رجله على القمر اتصل بيا خروتشوف وقى يا ابو العربى عيزينك احسن يورى جاجارين اغم عليه وبيدبدب رجله فى الارض ومش عايز يطلع القمر مستعد يا ابو العربى قولتلو طبعا ابو العربى دايما جاهز بس وطلعت وشوفت بورسعيد من فوق حاجة ايه بصلاه ع النبى وشورت لام العربى وسبت فوق الدليل ( سبت السمسميه بتعتى ) والى مش مصدق يطلع يشوف
من هو صاحب فكره انشاء( قناه السويس) ؟؟؟ هتفتى فيها انا بردو كنت اعد انا ودليسبس فى احد حوارى باريس وبعدين لمؤخذه سكرت وكان معايا برديه فيها الفكرة كنت اخدها من الملك (سنوسرت الثالث ) كان ادهانى ايام محفرناها سوا واحنا اعدين على شط بيلوز وكان
اسمى ساعتها ابو العربى راع وسرقها منى دليسبس وانا سكران ولما فوقت لقيتهم حفروها
والى مش مصدق يروح مقبره الملك سنوسرت ويشوف الكلام الى مكتوب (اوعى تكون بتعرف تقراء هيروغليفى تبقى نصيبه )
طب مين عمل مشروع توشكى ؟؟؟؟ والله ما انى هو انى عبيط
مين الى بنى صور الصين العظيم ؟؟؟
والاهرامات الثلاثه ؟
وبرج بيزا المائل ؟
وبرج الحمام ؟
وبرج ايفل ؟
انا بلا فخر بس مبحبش الشهره

Tuesday, May 29, 2007

و سار كوزى رئيس لفرنسا



وسار كوزى رئيس لفرنسا


انا قبل الانتخابات الفرنسيه اتصل بيا الرئيس جاك شيراك وقلى عيزك يا ابو العربى ضرورى مكدبتش خبر

اصل انا بحب جاك بصراحه هتقولى منع الحجاب عقولك دة راجل علمانى وطبق العلمانيه على الكل من غير خيار ولا فقوس وراجل محترم من الاخر ومتنحش معايا
المهم اخدت الفلوكه ورحت طالع انا ومسعد ( مسعد دة قبطان الفلوكه بتعتى ) ورحت داخل على قصر الشنزلزيه وقبلنى الراجل واستغربت اول مرة ميقبلنيش هو ومراته بقولو امال فين المدام قلى الموضوع الى انا عيزك فيه سرى للغايه وخاص بالانتخابات الفرنسيه والمرشحين فيها
وقلى انا اتصلت بالمرشحين وهما جايين دلوقت تؤعد معاهم وفعلا مفيش عشر دقايق نص ساعه كدة ولقيت قدامى ( رويال ) طبعا ما اولكوش انا بحبها من زمان رفيقه من الرفاق الاشتراكيين العوزاز على قلبى واول ما شفتنى فرحت قوى وراحت معيطه قولتلها متخفيش باذن الله طول ما انا وراكى متقلقيش من حاجة
وراح داخل اخينا ساركوزى بوش امه العكر ودمه الى يولطوش وراح داخل بعجرفه كدة وغلاسه ومن غير ما يسلم وراح اعد بصراحه مقدرتش امسك نفسى روحت قيلو مالك اله فى ايه اهدى شويه وراح جاك مهدينى ورويال فضلت تقولى متزعلش وكدة المهم راح متكلم انجليزى راح جاك اتعفرت وتنطط وقلو انا هنسحب انا مقبلش ان فى قصر الشنزلزيه واحد هيبقى زعيم فرنسا ويتكلم انجليزى روحت محلف شيراك برحمه ديجول لا انت اعد خليه يجيب اخرة
وقولت لكوزى ولا متنساش نفسك انا اعرف اصلك وفصلك دة انت واطى يلا واصلك يهودى وتعمدت وبقيت كاثوليكى وابوك مجرى وانا اعرفه وكان شغال فى التليفونات وامك كانت فى حرب 56 والبورسعديه مفلتوهاش ففوق كدة وحط واطى يا ابن الواطى الحق وشه احمر وكان هيعيط وقلتلو واحد منجحش فى جوازة هينجح فى رئاسه فرنسا ومراتك الثانيه سيسيليا سمعتها معروفه كانت فرشه فى شارع الشنزلزيه بشربات ولا ايه
راح قلى هو انا قولت حاجة ياعم انا متكلمش معاك المهم انا استنتجت كدة من كلامه عشان مطولش عليكم انه تبع امريكا ومؤيد لسياستها فى الشرق الاوسط وهيرجع فرنسا لورا فوق الخمسين سنه
والى مش مصدق يسئله

Thursday, May 10, 2007

اهو دة الى حصل ابو العربى وصل

السلام عليكم
اشطه عليكم ورد عليكم فل عليكم
صلو ع النبى ...... كمان ذيدو النبى صلا........
انا بقى ابو العربى هتكلم معاكم على كل حاجة واى حاجة
هوريكو التحليل السياسى المظبوط عن تجربه وعن وعى بصلاه ع النبى
ودة هيبقى ناتج عن تجربه شخصيه مع الوزراء والرؤساء وصناع القرار
والى يصدق يصدق والى ميصدقش هو حر هو انا هجبرة
ودة اول كلام عندى