Saturday, February 18, 2012

فار فى اوضتى


اعتداء غاشم عندى فار فى اوضتى حد ضاحك عليه ومفهمه انه كلب

قالب الدنيا تنطيط ومندمج قوى ابن العبيطه
وجايبله مصيده وحاطط فيها جبنه رومى ال احنا ك بنى ادمين مبنجبهاش غير فى
المناسبات واعتبرت وجوده مناسبه وجبتها ومطفحهاش

وجبت امبوبه لزق ب 8.5 وجيبت كراتين وحطيت عليها السمغ وفيها طماطم تشرح
القلب اكلها ابن الكلب وملزقش وشوبشوبى انا ال لزق

انا خايف ان حد يقنعه انه ديناصورويعيش الوهم ويكسر عليا الاوضه
وواحد فقيق بيقولى على الفيس هاتلو نعناع ...اروق دم امه يعنى و لا ايه واجبله نعناع منين انا دلوقت الساعه 3.30 فجرا
وباين عليه كان اخد فرقه صاعقه عمال يطلع فوق الدولاب وينط مبيهبطش ابن المؤذيه

يارب ما يطير عصفور يا اخواتى ده بيزقزق

انا بحمل المجلس العسكرى المسؤليه كامله

Tuesday, January 24, 2012

الشهيد الحى


عاد لينتقم

الا ما حد سئل عليا يعنى ولا اهتم انا فين ولا اكن حاجه ناقصه فى مصر والعالم العربى وكوكو الارض
ياعالم معندهاش انتماء ولا وفاء ده انا ابو العربى يا بشر

باختصار بصلاه ع النبى انا استشهدت يوم 28 يناير

متستغربش انا مش كذاب ولا عمرى كنت هجاص ولا نخاع ولا بمهيص انا ذى ما بقولك كده
انا اتضربت 1200 خرطوشه فى صدرى وجريت اتفادا المطاطى نزلت تحت عربيه مدرعه
اتشعلقت فى الشكمان علبه السجاير وقعت نزلت اجبها عيل بموتوسكل خبطنى
وكل ده ليه عشانكم بس انتم مصنتوش الامانه

لكن لااا ده انا ابوالعربى يابلد مجبتش ولد غيرى


انا مروحش بلاش انا جيت حقى برقبتى
ام العربى متصابه والواد فى المعتقل وانا شهيد والواد مسعد بقى ثورجى
وانا ما خدتش حقى


البنطالون ال اتقطع ده تمنه عند مين يا مصر؟؟؟
والكوجيرت ال اتمزق من ضرب النار عند مين يا مجلس ؟؟؟
انا مش هسيب حقى وهنتقم


Thursday, November 25, 2010

اثيوبيا تهدد مصر ....مصر مندهشه ... بورسعيد ترد

الراجل القفص ده قال كلام كده مش ولا بد ربك والحق انا الدم جرى فى عروقى روحت عامل تعبئه عامه وجمعت من كل حى من احياء بورسعيد ميكروباص وزعقت وقولت يا نعيش عيشه فل يا نموت احنا الكل وامنت على السلاح
( سكاكين سلك ومطاوى قرن ومقروطه ) ولسه بدور الميكروباص وهطلع ........جالى تليفون


ايوه مين لقيتو ميليس زيناوى قولتلو انا جايلك يا رجوله يا بلد مجبتش راجل راح معيط وقالى مقصدش بورسعيد يا ابو العربى انا اقصد المصريين وطبعا بيتكلم اثيوبى روحت انا صارخ فيه وقايلو اوعى تفكر ال حصل ايام الخديوى اسماعيل ممكن يحصل انا بس مكنتش هنا وكنت مقيل ونايم حبه انا لو كنت على راس الجيش ال جالك برئاسه
( مـنزينجـر باشا النمـساوي) كنت اهديت بلادكم لاريتريا مجدعه


يا بلد قايمه على زراعه القهوه يا ولاد النيمه


ده انتم مشهورين بزراعه السمسم تقول مش هنقدر عليكم عسكريا ونسئل ال قبلنا


احنا رجال افعال انت فكرنى قفه وهندهش انا مش بتاع اندهاش انا جدع قوى
عاشت بورسعيد حره مستقله
بلد الرجال والافعال

Saturday, October 30, 2010

الحمله الشعبيه لوضع صوره ابو العربى على الربع جنيه

الحمله الشعبيه لوضع صوره ابو العربى على الربع جنيه

فى مكتب وازير الماليه

وسع يا جدع انت احسن اطلع ترابنتيشك والعب فى وشك البخت
يوسف جوه
السكرتير: ايوه وبطرس باشا معاه
حلو قوى انا عايزهم هما ال تنين
بطرس : فى ايه يا ابو العربى مالك
شوف ياعم بطرس احضرنا بقى انا عايز ابنك
يوسف : اتفضل يا ابوالعربى بيتك ومطرحك
انا مش هتكلم كتير قوووول ملك ولا كتابه قووول والطلعه ب 100 جنيه
يوسف : كتابه هاهاهاهاهاهاهاها
تكسب
تانى ملك ولا كتابه
يوسف : هاهاهاهاها كتابه
تكسب
يوسف : متتعبش نفسك يا ابوالعربى ده احنا ال عملينو احنا بتوع اللعب

يعنى ايه يعنى انا خسرااان على القهوه فوق ال 100بسببك الربع جنيه مفيهوش غير كتابه مفيهوش غيركتابه مفيهوش غير كتابه

الحاجه الوحيده ال تنفع تتعمل بالربع جنيه مش هنعرف نعملها يا ظلمه




Monday, October 25, 2010

المسلمين والمسحيين والفاسدين

يا سلام يا ولاد الحياه حلوه الله يمسيك بالخير يا ابن خلدون ده كان حبيبى مع انه سرقنى
ابو العربى مؤسس علم الاجتماع يتحدث
الاديان فى مصر

مسلمين مسحيين فاسدين

وحده وطنيه بين الياء والنون

والله ياجدعان هذا البحث بصلاه ع النبى خد منى وقت جبار حيث ( حلوه حيث دى ) ثبت ان دين اهالينا فى بورسعيد طالع على تصرفاتهم وال ايه هم شعب متدين بطبعه

المواطن المسلم / بيحط صوره الفلق والناس او خمسه وخميسه خوفا من الحسد وخوفا من الشر عموما
المواطن المسيحى / بيحط صوره العدرا او قديس كلمه من الانجيل خوفا بردو من الحسد او الشر عموما

المواطن الفاسد / بيحط صوره حسنى مبارك او جمال مبارك خوفا بس مش من الحسد ولا الشر ده خوف من القانون يعنى يكون صاحب مخانه او قهوى وفارش الكراسى فى الشارع او بيبيع حاجات فاسده تلقيه حاطط صوره الزعيم بتاعهم وابنه
واى حد بيأيده فى جرنال او اعلان تعرف انه وراه فساد كبير قوى
وسلامى للوحده الوطنيه للفاسدين ياعنيه

Sunday, March 21, 2010

مفيش حشيش فى البلد

مفيش حشيش فى البلد
ازدحام غريب اسفل احد بلاكونات المدينه الحره نحيب يرتفع وهرج ومرج ادخنه بروائح غريبه كلمه لاااااااااااا هى الاكثر ارتفاع بين كلمات المتجمهرين والبعض يستغيث يا ابو العربى يا ابو العربى الحقنا
مسعد : وحدو الله يا رجاله هيطلع اهو هيطمنكو الخبر الاكيد عندو
الجمهور : اهو الشباك بيتفتح الستاره بتتحرك اهو اهو اهو
على وجهه كثيراا من عملات الاستفهام عيناه زائغتين يمينا ويسارا ويبدو فى غايه الغيظ والارق لم نعهده هكذا انه ابو العربى
وبصوت متهدج ومتقطع وعيناه تلمع ويقول

انا عارف مالكو ايوه مفيش حشيش ولا عند السعيد ابووليد ولا العربى رجب ولا مع اى سريح فى شارع السواحل وعارف ان الموجود حنه ايوه حنه وكلكو اتزقيتوواتبعتو وشامم ريحه زباله محروقه بقالى يومين فى بورسعيد كلها
مسعد : ده بنجو يا كبير
عارف يا ناصح وعارف ان سيسل وكاب دور ( بارات ) بقى عليهم ضغط كبير اليومين دووول و الصيدلايات بردو انا مش عارف الحكومه بتعمل معانا كده ليه فى اشاعه طالعه ان انا اتكيفت بكل حشيش البلد لوحدى محصلش وفى ناس بيقولو ان الحشيش اتصدر المانيا عشان التخدير بتاع العمليه اياها وانا حاسس انهم عيزين يغلوه والحكومه هترفع الدعم عنه انا خلاص مسافر افغانستان وهروح اتكيف فى مخانات تورا بوراانا ومؤمن ال عايز يجى
انا مش هشرب بانجو ولا برشام وكمان الخمره حرام
مفيش كلام على لسان الشباب غير ان مفيش حشيش فوقو بقى الاقصى فى خطر


احترس من الفله الحمرااااااااااااااااااااا
شجع صناعه بلدك واشترى المصرى وحافظ على صحتك
والله الواحد اطمن قوى لما شاف التحذير الجديد ال على علب السجاير التحذير ده طبعا لاصحاب الفله الحمرااا
وانا بقول لمدخن الكليوبترا ارفع راسك وبقول لزوات الفلل الحمرااا احترس وبطالب وزاره الصحه انها تشيل التحذير ده من على العلب الكليوبتراا لانه مش موجهه لينا

Monday, March 16, 2009

الثروه السماكيه والحراميه ولاد المؤذيه



مسعد: اهو جاى من بعيد والصناره فى ايد والمرجونه فى ايد ومش هقول ولا اعيد على صياد بورسعيد بارك وصلى ع النبى الحموله تزيد جاى خفيف بس السمك ع الربع نقل اكيد وسع اجدع
ابو العربى : بس يا مسعد
مسعد : متخفش من الحسد يا ريس خمسه كيلو فى خمسميه وربنا يبعد عننا الحسوديه
ابو العربى : بس يا مسعد
مسعد :الكل هياخد الى عايز غطيان وابو كرش المليان والبربونى والصيجان
ابو العربى : بس بقى يلعن ابو امك هات الميكرفون اءيهىء اه
الجمهور : مالك يا ريس فى ايه يا ابو العربى طمنا عليك
ابو العربى : انا من الاف السنين بصطاد ايام ما كان البحر فيه خير لما كان البحر فى شارع الثلاثينى لما كونا بننزل نجيب السمك بادينا وكنا بنتعامل معاه بلغه الاشاره وكنا ناخد الكبير ونرمى الصغير وكان فى معاهده والكل بيرزق دلوقت حتى النورس مش لاقى ياكل واهل بورسعيد بيرمولو عيش من المعديه

البمبوطى : تلوث يا ابو العربى

ابو العربى : لا يا ابن عمى
حرميه الزريعه يا بمبوطى ( كل يوم الساعه 6 الصبح بيطلعو على عربيه ربع نقل هتلقيهم فى صندوق العربيه 4 يمين واربعه شمال والقارب فى النص وعلى عينك يا حكومه )

الحكومه بتعمل كده عشان تحرجنى قدمكم واكنى مش هقدر احمى السمك فى الميه
مسعد : حتى السمك فى الميه بيقول ابو العربى ميه ميه

حرميه الزريعه بيبيعو الزريعه لمزارع الاسماك


احنا لازم نقف للحرميه دول وقفه رجل واحد

ونقطع لسان مسعد