وحيات امى ما انا رايح قصر الرئاسه تانى
بقى انا كل شويه يطلبونى اروح قصر الرئاسه عشان مباحثات مهمه وام العربى تقولى وهما ميجولكش ليه بصراحه قولت سمعه مصر ومقام مصر وكده بس يا جدعان ده اى حد بيعدى من فوق قصر الرئاسه الريس بيأعد معاه انشاله يكون مسؤول البمبرز فى سلوفينيا
وانا عشان سمعه بورسعيد هبقى ابعت مسعد يروح هو قصر الرئاسه ومحدش يقولى ام العربى سخنتك
ابو العربى ليه مقامه بردو
العربى ملوش دعوه
اتصلت بانس الفقى استفهم منه ايه حكايه وثيقه الاعلام العربى وطلبت منه تقرير عن الوثيقه دى واذاى يزجو باسم العربى فيها وطمنى انها مش مقصوده وقلتلو مين من القنوات المستهدفه وطمنى ان محدش هيجى جمب قنوات الهلس يعنى هشوف هيفاء وهبى وروبى وكده واكدت على تغيير اسم الوثيقه ويتشال منها العربى
اظن كده ملكوش حجه
واستغلال للموقف
بعد ما سمعت موضوع الغاء الجنيه الورقى ندهت مسعد (قبطان الفلوكه ) وقلتلو بينا يا عرب ع الصين وروحت للمصنع بتاع عم شيكو هاما وخليتو يصنعلى سورر بتاعت زمان دى الى بيتحط فيها الدنانير لان معتش ينفع محافظ خلاص ده انا بحدف للواد مسعد 2 جنيه من البلكونه اتبطح وفضل يشلب دم (ينزف
ومعتش فى داعى للخزن ممكن تبقو تجيبو زلعه زى بتاعت على بابا
اتبع الخطوات التاليه للحفاظ على الجنيه المصرى الجديد
1_ تاكد ان جيوب البانطلون سليمه مفيهاش اخرام
2_وانت بتدى الواد المصروف الصبح اربط الجنيه بدباره
3_وانت بتشترى البنطلون احرص على وجود الجيب الصغير (عرفت لازمته )
4_متحدفش لحد فلوس من البلكونه عشان ميتبطحش
5_لو انت من اصحاب المحلات بلاش درج اعمل صفيحه
6_لتجنب الشخلله ضع مناديل كتير فى جيبك
7_اشترى سره من استيراد ابو العربى
عيش وسط اهلك
ابو العربى قرر عمل حمله وسماها عيش وسط اهلك احسن ما تموت فى طابور العيش تعمل جورن فى البلكونه يعنى فرن فلاحى بس طبعا ده للغير قادرين على تحمل مخاطر طابور العيش مش اى حد يعنى بس الى يعرف يجيب رغيفه بالدراع فده احسن ويجبلى رغفين معاه
71 comments:
انا بحجز 2000 سره يا بو العربى
بس انت مقولتش السره بكام ؟
عموما ابعت انت والحساب يجمع
ما أعتقدش أننا في حاجه للأرشادات الخاصة للحفاظ على الجنيه المصري لأن قيمته في الزمن ده زي القرش صاغ أيامي
والله ضحكتنى بجد يا أبو العربى لأن الأحداث التى تمر بها مصر الأن تجعل الإنسان فى توتر دائم وفى حالة خوف من المجهول؟!!!
أحييك على هذا الأسلوب الساخر المضحك المبكى لأننا محتاجين فرفشة شوية عند الإستماع للأحداث اليومية حتى لا نصاب بالإكتئاب وأوصيك وأوصى صناع الخزن بأن يعودوا إلى تصنيع السيالة لحفظ النقود وأن يكون شعارهم متفق مع شعار وزارة المالية (سيالة لكل مواطن)؟؟ ما تقوليش بقه يا أبو العربى إنك ما تعرفش السيالة أصل أزعل منك وتخلى بتوع كفر الهنادوة يتقلبوا ضدك
دي أول زيارة ليا..وبصراحة المدونة دخلت دماغي بالجامد...
أما بقى عن حكاية قصر الرئاسة دي..ففعلا كتر خير حضرتك يا سيد أبو العربي..بس مش مشكلة يعني ضحي شوية عشان الشعب..وبلاش تتأثر بكلام الست أم العربي..
........أما عن وثيقة مش عارف غيه دي...فكده مابقتش فيه مشكلة مادام روبيوهيفاء لسة موجودين..يعني مفيش زعل..ز
...أما عن حكاية الصرر دي...فوالله عندك حق ..الواحد محتار يعمل ايه في الجنيه دلوقت...
...وبالنسبة للعيش..فانا عجبانب حكاية الفرن دي...بس فيه مشكلة..كام واحد في الشعب عنده بلكونة حضرتك
انا بقى عملت موضوع حلو قوى جبت جهاز المبيوتر بتاعى وشويه فول حراتى
وقاعد قدام الفرن 24 ساعه
هههههههههه
ادى حالك يا مصر وشوفى ولادك بقوا بيعانوا ازاى
لا تعليق
حال البلد لا يرثى اليه
تحياتى ولاء
تعليقات جميلة يا أبو العربي
بس ياريت علشان نعرف نحافظ على الجنية الفضة يعملوه زي الربع جنيه
يعني يكون مخروم علشان نعرف نربطة بدبارة او فتلة حتى
وبعدين هما عملوا جنية فضة علشان لما يعوموه يغطس وما يقبش تاني
تحياتي
ههههههههه
جميل اوى
بسم الله
وتبقى مصر ام الدنيا
تقبل تحياتى
جيلان
بص
والله العظيم مدونتك دى دخلت دماغى اوى اسلوبك هاااااااااااايل
برافو عليك والله
تقبل تحياتى
وبجد والله ومن غير مجامله
المدونة جااااااامده
وطريقتك كمان فى الكتابه
فظييييييييييييييعه
ربنا يكرمك
تقبل تحياتى
عمار
ههههههه
حلوة موووووووووووووت الارشادات بس اقولك بقى والله احنا نستاهل احنا اكتر شعب بيكعبل الفلوس فى جيوبه
وبعدين خلى الشعب يشخلل هههههههه انت مضايق ليه
السلام عليكم
اشكرك اولا على زيارتك الغالية لمدونتى المتواضعة
واتمنى لك التوفيق
أنا أول مرة أدخل مدونتك بس بجد
مدونة فعلا دمها خفيف
بالنسبة لموضوع العيش تصدق ان خالتى بقت تعمل العيش عندها فى البيت بس هى مش علشان أزمة الطوابير لأن فى مصر الجديدة ماتلاقيش أزمة طوابير بس برده ماتلاقيش أفران بتبيع عيش بخمسة قروش
كله عندنا ب30 و50 قرش
أما عندنا فى البلد فمعظم الستات بيخبزوا عندهم فى البيت والست اللى تتجوز من غير لما تكون بتعرف تخبز العيش الكبير ده مش فاكرة اسمه بتبقى عيبة فى حقها وحماتها تقعد تذلها يا خايبة ياللى ماتعرفيش تعملى حاجة
ههههههههههههه
بذمتك مش أحسن حل فعلا كل الستات ترجع تخبز من أول وجديد
لتجنب الشخلله ؟؟
تحفه والله
اضحكك الله كما اضحكتنى
سلام
اه على فكره ... انا من عشاق ناصر موت ... و ضد اللى بيعشقوه على حساب بقيه العظماء برضه
ودايما بقول لولا الحماسه وعزه النفس اللى بثها ناصر فى نفوس المصريين ... مكناش قدرنا نحارب بالقوه دى
الفكره امها سلسله من العظماء مينفعش نحب حد اكتر من التانى ولا نقدر حد اكتر من التانى لانهم ببساطه بيكملو بعض
هههههههههههه
لا الوثيقة دى هتخلينا منتفرجش
على روبى وهيفاء
فانا بدعو لعمل مظاهرات حالا
هههههههههه
اما بالنسبة للموكوس بتاعنا الجنيه المصرى
اللى بقى يهدد سلامة المواطنين
وبيبطح ناس كتير فى نافوخهم
بجد مش عارف اقلك ايه وحلوة فكرة الصفيحة دى
انت مشكلة
برافو عليك بجد
حلوة حكاية السرر دى
بس انت مقولتش حتوزعها جملة ولا حتبيعها ع الفرش بتاعك
بلدياتك
انا بس حبيت اصبح واششكرك على زياتك للمدونه
وعلى فكره مدونتك حلوه اوى
ربنا يلطف بينا
ويرحما برحمته
اشطه يابو العربي يا مظبط شباب الامة
قال وثيقه قال
هو التليفزيون من غير موزز ينفع ببصلة
بجد انت شاب من الآخر
الله ينور
دمك شربااااااااااااااااااااااااااااااات
ابو العربي
عاجبني دايما انك صاحي وواخد بالك من أي شئ أو دعايه يزج فيها اسمك الكريم وكويس انك كلمت الفقي حاكم الناس دي ما بتجيش غير بالعين الحمرا
ولك كل الشكر على نصايحك الغالية كانوا زمان بيشتروا النصيحة بجمل شوف بقا انت ليك عندي جمال قد ايه ولازم اجيبهم لك لحد عندك وليك عليا اجيبهم نياق حمر من أرض النعمان هو انا أقل من عنتره ابن شداد
وعلى فكرة المناديل كده هتغلى وسعرها هايزيد والمصطلح اللغوي لكلمة سُرة هايرجع ياخد مكانه من تاني وكل واحد بقا يخلي باله من سُرته
تحياتي ياأبو العربي
تمام فعلا هى دى الخطوات العمليه للحفاظ على الجنيه المصرى
سره من الدنانير
اسلوبك جميل
وبالنسبه للجنيه
نصايح غاليه
اقولك
اعتقد انهم هيخلوا كل الفلوس معدنيه
عشان يحسبوا لنا المرتبات بالكيلو
ويصورونا واحنا بنقبض
ويبقى مفيش حد بيشيل فلوس قد المصريين
لاء وممكن اللى صحته مش مساعداه يقول كفايه فلوس
مش قادر اشيل
مش كده ولا ايه
تحياتى
السلام عليكم
اضحك الله يا شيخ
و حلوة حكايه السره دى
سره من الجنيهات
إ
تحياتى ابو مفراح
يعنى الجنية الورق خلاص هيلغوه يعنى ولا الاتنين هيكونوا مع بعض؟
ههههههههههههههههههههههههههههههههههههههههههههههههههههههههههههههههه
بما انك على اتصال بمسئول البمبرز ده فيا ريت توصيهملي على حتة كبيرة للكراسي اللي عرقت من طول مدة قعاد الحكام عليها
بوست جميل
ابو العربى
الموضوع الاولانى انا مع ام العربى فيه من طلع من داره اتقل مقداره وغنى ليهم اغنيه اللى عاوزنى ييجى لى انا مابروحش لحد وهو عيب ان الوليه ام العربى بتحافظ على كرامتك قدام اللى يسوى واللى مايسواش .
الموضوع التانى .موضوع وثيقه العربى جيت . انت ماتسبيش حقك ولازم تاخد حق الواد عربى من انس الزفت ده . اشمعنى الاقصر بياخدوا فلوس على اسمها هو العربى ااقل من الاقصر ولا ايه
الموضوع التالت .والله الواحد بقى يتكسف لما يجيب سيره الجنيه . بالمناسبه ايه العلاقه بين الجنيه والجنايه والجنيه اللى بتطلع لك من البحر .
نيجى بقى لموضوع الرغيف يااقولك ايه عيش عيشه اهلك وكل باتون ساليه او بتى باتيه او كروسوان .مالك ومال الافران هى دى من مستواك يعنى عاوز تعمل لنا مصيبه لما تاكل العيش ده ويجيلك تلبك معوى ونجرى على المستشفيات ووجع الدماغ الناس مقامات وانت مقامك كبير ياابو العربى
سلامى لام العربى والوله مسعد وايه اخبار الشبار
والله ياابو العربي حكاية العيش دي حكاية بصحيح عشان كده قررت اني اعمل مشروع عشان احل المشكلة دي للشعب المصري ابقى ادخل مدونتي واعرف المشروع الجديد بتاعي
وبالنسبة للارشادات فحاول اعمل بيها برغم من اني في ضائقة مالية اختك خلاص ياابو العربي هتبيع مدونتها وهتشحت قريب
تحياتي
حسستني ان شعب مصر لسه بخير مادام لسه بيتمتع بخفة الدم دي و ما تنساش تسلم لي علي الريس لما تشوفه المرة الجاية :)
حلو قوي يا بو العربي
مدونة مية مية
والنبي يا ابو العربي لما تروح للريس تاني
قوله كفاية كده
وسلم لي على انس الفقي بالمرة
ونما الكاشات والجنيهات والسرر
فانت عارف يا اخويا
ماعدش فيه
ومش عاوزين جيوب ولا سرر
ههههههههه
والله أمالعربى دى ست أخر كرامه طبعاً هوأبنها أبوالعربى يتساوى أخر الزمن مع الراجل بتاع البمبرز
يا خرابى بطلوده وأسمعوده
عموماً كل نصائحككتبتها على باب الثلاجه عشان أحفظها و أحفظها للعيال
أحسن حد فيهم يتهور ويحدف لواحد صاحبه الجنيه فى المدرسه يشلبه دم
أه ماهى مش ناقصه كفايه الدم ألى بيشلب فى طوابير العيش
فتك بالعافيه يا أبوالعربى
وشالله يخليك لينا
هههههههههه أنا مهمة جدا هى إن شعب القناة كلوو دمة خفيف موووووووووت
مدونتك جميلة اوى
عبده الرايق
ماشى يارايق ابعت انت بس اى حاجه تحت حساب وانا تحت امرك
maksofa
ده اقل من السحتوت لو حضرتك عصرتيه بس بردو اهو للتأكيد لازم نشرح
دكتور بيطرى
ايه يا دكتور بس سياله ايه انت جاى تقطع عليا خلينا نبيع السرر ومتفتحش عيون الناس على السياله
واكيد اعرفها هو فى حاجه ابو العربى ميعرفهاش
دواير
حضرتك نورتينى بفكرتك كام واحد فى الشعب عنده بلكونه ده انا معنديش بلكونه مش هزار بس ممكن قدام السلم على البسطه نتصرف يعنى
صوت من مصر
حلوه بس الفول الحراتى 4 جنيه ده انت شكلك معاك فلوس ومولعها
walaa
حال البلد ذى الفل طول ما انا موجود
فى حب مصر
لا بلاش يخرموه والنبى ده بردو جنيه وليه احترامه
احمد صباغ
والله انت الى عسليه
alqassam
وتبقى ذى ما تبقى بنحبها
بورسعيد طبعا
amaaar
والله انت بجد ربنا يكرمك
appy
خليه يشخلل انا مالى
رئيسه حزب الاحلام
اى خدمه
تائهه فى ارض الاحلام
والله دى احسن فكره بس بردو الدقيق غالى مفيش حل
حراس الحقيقه
ماشى كلامك ولازم بردو نحب ابوالعربى لانه من العظماء
مدحت محمد
وانا بضم صوتى لصوتك
اهو ده عيبه
هسرح بيهم عيال فى التجارى ومحمد على وعلى القطر حبيبى يا بلدياتى
حبه حاجات ايمان
متشكرييين
هبههوب
امين يارب العالمين
ولو
والله انت الى دمك شربات ال شربات ال
وده وصف ده شربات ماشى
حسن ارابيسك
حبيبى والله كل واحد يخلى بالو من سرته وميلبسش استومك
متنساش الجمال اكيد
على اسم مصر
ابو العربى حلوله عبقريه
منى
هههههههههه والله ممكن بردو
ابو مفراح
الله يديم عليك الابتسام والضحك بسببى واخد ثواب انا
monalizaa
من كلامى مع الجنيه الورق رفض انه يفضل مع المعدن عشان فى مشاكل بنهم
على الطريق
انت تؤمور يا باشا
ابو النجوم
المستشار الشخصى ليا ابو النجوم
ام العربى دائما على حق وده مش خوف منها بس احقاقا للحق والجنيه والجنيه والجنايا كلها حجات تودى فى داهيهه
هو اشبهه بالجنيا عشان بيختفى بسرعه اما الجنايه فهى سبب الوصول للجنيه
والشبار تمام
ايامنا الحلوه
ولايهمك انا معايا قرشين صومالى عينهم لوقت الزنقه مش خساره فيكى
ام احمد المصريه
هسلملك عليه وهقولو اصله بيحب الناس قوى
فى القلب
ربنا يخلينى ليكو ويدمنى عليكو نعمه ويحفظنى من الفساد
دعاء مواجهات
بورسعيد وبس شعب القناه هو الشعب البورسعيدى عنصريه بقى
ابو العربى تسلم ياغالى على النصايح دى المشكلة ان مابقاش فى فلوس اصلا عشان الواحد يحوشها عموما لو ربنا بعت فلوس اكيد هنحطها فى سرر وانا عن نفسى هحنطها للذكرى واهو الجنية الفكة ينفع فى الايام العكة
ربنا يفوقك
أخى الكريم أبو العربى سعيدة جدا لدخولى مدونتك أصل انا بلدياتك بس عايشة بره مصر ايه فكرتنى بالايام الجميلة يا ريت لما تروح قصر الرئاسة تبقى تأجلى معادى أصلى مالييش نفس أروح و يا ريت تحجزلى زلعة علشان الجنيه الجديد مع تحياتى لكل اهالى بورسعيد
بجد بجد البلوج تحفة
(c:
و الله أنا بقالي نص ساعة بضحك لغاية ماالحاجة صحيت من النوم و زعقتلي :D
ندخل في الكلام الجد بقي
المرة الجاية سلملي على أنوستي و قوله (على رأي هويدا طه)
" بحبك يا ستاموني " و عايزاك تجبيلي معاك 5 سرر للأسرة كلها بس يكون نوع ردئ وحش يعني مش نوع غالي اصل بصراحة خسارة في الجنية المعفن ده نوع نضيف
و قبل ما أنسي
و حياتك المرة الجاية سيبك من سمعة مصر و روح قصر الرياسة بنفسك
_معلش تعالي على كرامتك_
و قول لعم حوسني يسيب الكرسي بقي و طبعاً عشان إنت ليك مقام كبير بردو هيسمع كلامك إمديتلي
تحياتي و تمنياتي بالتوفيق
وانت ابدعت با ابو العربي
ويوم ما تتاجر تتاجر فى السرر برضة
لعلمك بقى انا قلت لوزير المالية يخرملنا الجنية
وهنعبية فى مداليات بعد كده .. واهوا الى مش هيعجبك تبطحة بكبشة الجنيهات
واهو ممكن ساعتها هيبقاله لازمة
:)
ابو العربى
وحشتنا ياراجل ولا هى ام العربى حالفه عليك كمان ماتردش على المدونين . وايه اخر اخبار الاضرابات عندك ياترى عملت اضراب ولا بتضرب فى البيت وخلاص ولا بتضرب انفاس فى الخباثه واهو كله ضرب .سلامى للعربى وام العربى وابو العربى وكل خط القناه تمن سلام من بلاد الفلاحين اللى مش فالحين ووصيتى لك لما تقابل بابا حسنى تبوسه من بقه وانت عارف ليه
كلمه حق
دى نصيحه لوجه الله بس بردو اهم حاجه تكون السرر مطبوع عليها ابوالعربى لميتد
gannah
فكرتينى بالبورسعيديه المغتربيين ممكن نعملكم حاجه بردو كده عشان تصوتو وطبعا انا هعتبر مرواحك للرئاسه اكنه محصلش عشان دى خيانه عظمى وهلغيلك زيارتك مش هاجلها
والزلعه جاهزه
وحقها وصل
شروق مدونه تحت العشرين
ماشى 5 سرر وتخدى وحده هديه خصم للكميه
اروح قصر الرئاسه اهو ده الى مش ممكن ابدااا والله العظيم ما انا رايح معلش بقى
اقولو ايه بس ده انا تعبت
بنوته من وسط البلد
هو انتى الى قولتى يخرمو الجنيه لاااااااااا هى نقصه الجنيه المصرى لاممكن ينخرم ابدااا
ابو النجوم
عمى وعم عيالى تعرف ان حد ممكن يحكم على ابوالعربى اما الضرب انا ضربت محشى جامد ونايم من سعتها
وهخدك معايا المره الجايه عشان تبوسه بنفسك من بؤه
Post a Comment