اثيوبيا تهدد مصر ....مصر مندهشه ... بورسعيد ترد

الراجل القفص ده قال كلام كده مش ولا بد ربك والحق انا الدم جرى فى عروقى روحت عامل تعبئه عامه وجمعت من كل حى من احياء بورسعيد ميكروباص وزعقت وقولت يا نعيش عيشه فل يا نموت احنا الكل وامنت على السلاح
( سكاكين سلك ومطاوى قرن ومقروطه ) ولسه بدور الميكروباص وهطلع ........جالى تليفون


ايوه مين لقيتو ميليس زيناوى قولتلو انا جايلك يا رجوله يا بلد مجبتش راجل راح معيط وقالى مقصدش بورسعيد يا ابو العربى انا اقصد المصريين وطبعا بيتكلم اثيوبى روحت انا صارخ فيه وقايلو اوعى تفكر ال حصل ايام الخديوى اسماعيل ممكن يحصل انا بس مكنتش هنا وكنت مقيل ونايم حبه انا لو كنت على راس الجيش ال جالك برئاسه
( مـنزينجـر باشا النمـساوي) كنت اهديت بلادكم لاريتريا مجدعه


يا بلد قايمه على زراعه القهوه يا ولاد النيمه


ده انتم مشهورين بزراعه السمسم تقول مش هنقدر عليكم عسكريا ونسئل ال قبلنا


احنا رجال افعال انت فكرنى قفه وهندهش انا مش بتاع اندهاش انا جدع قوى

عاشت بورسعيد حره مستقله
بلد الرجال والافعال

الحمله الشعبيه لوضع صوره ابو العربى على الربع جنيه

الحمله الشعبيه لوضع صوره ابو العربى على الربع جنيه

فى مكتب وازير الماليه

وسع يا جدع انت احسن اطلع ترابنتيشك والعب فى وشك البخت
يوسف جوه
السكرتير: ايوه وبطرس باشا معاه
حلو قوى انا عايزهم هما ال تنين
بطرس : فى ايه يا ابو العربى مالك
شوف ياعم بطرس احضرنا بقى انا عايز ابنك
يوسف : اتفضل يا ابوالعربى بيتك ومطرحك
انا مش هتكلم كتير قوووول ملك ولا كتابه قووول والطلعه ب 100 جنيه
يوسف : كتابه هاهاهاهاهاهاهاها
تكسب
تانى ملك ولا كتابه
يوسف : هاهاهاهاها كتابه
تكسب
يوسف : متتعبش نفسك يا ابوالعربى ده احنا ال عملينو احنا بتوع اللعب

يعنى ايه يعنى انا خسرااان على القهوه فوق ال 100بسببك الربع جنيه مفيهوش غير كتابه مفيهوش غيركتابه مفيهوش غير كتابه

الحاجه الوحيده ال تنفع تتعمل بالربع جنيه مش هنعرف نعملها يا ظلمه

المسلمين والمسحيين والفاسدين

يا سلام يا ولاد الحياه حلوه الله يمسيك بالخير يا ابن خلدون ده كان حبيبى مع انه سرقنى
ابو العربى مؤسس علم الاجتماع يتحدث
الاديان فى مصر

مسلمين مسحيين فاسدين

وحده وطنيه بين الياء والنون

والله ياجدعان هذا البحث بصلاه ع النبى خد منى وقت جبار حيث ( حلوه حيث دى ) ثبت ان دين اهالينا فى بورسعيد طالع على تصرفاتهم وال ايه هم شعب متدين بطبعه

المواطن المسلم / بيحط صوره الفلق والناس او خمسه وخميسه خوفا من الحسد وخوفا من الشر عموما
المواطن المسيحى / بيحط صوره العدرا او قديس كلمه من الانجيل خوفا بردو من الحسد او الشر عموما

المواطن الفاسد / بيحط صوره حسنى مبارك او جمال مبارك خوفا بس مش من الحسد ولا الشر ده خوف من القانون يعنى يكون صاحب مخانه او قهوى وفارش الكراسى فى الشارع او بيبيع حاجات فاسده تلقيه حاطط صوره الزعيم بتاعهم وابنه
واى حد بيأيده فى جرنال او اعلان تعرف انه وراه فساد كبير قوى
وسلامى للوحده الوطنيه للفاسدين ياعنيه

مفيش حشيش فى البلد

مفيش حشيش فى البلد

ازدحام غريب اسفل احد بلاكونات المدينه الحره نحيب يرتفع وهرج ومرج ادخنه بروائح غريبه كلمه لاااااااااااا هى الاكثر ارتفاع بين كلمات المتجمهرين والبعض يستغيث يا ابو العربى يا ابو العربى الحقنا

مسعد : وحدو الله يا رجاله هيطلع اهو هيطمنكو الخبر الاكيد عندو

الجمهور : اهو الشباك بيتفتح الستاره بتتحرك اهو اهو اهو

على وجهه كثيراا من عملات الاستفهام عيناه زائغتين يمينا ويسارا ويبدو فى غايه الغيظ والارق لم نعهده هكذا انه ابو العربى

وبصوت متهدج ومتقطع وعيناه تلمع ويقول

انا عارف مالكو ايوه مفيش حشيش ولا عند السعيد ابووليد ولا العربى رجب ولا مع اى سريح فى شارع السواحل وعارف ان الموجود حنه ايوه حنه وكلكو اتزقيتوواتبعتو وشامم ريحه زباله محروقه بقالى يومين فى بورسعيد كلها

مسعد : ده بنجو يا كبير

عارف يا ناصح وعارف ان سيسل وكاب دور ( بارات ) بقى عليهم ضغط كبير اليومين دووول و الصيدلايات بردو انا مش عارف الحكومه بتعمل معانا كده ليه فى اشاعه طالعه ان انا اتكيفت بكل حشيش البلد لوحدى محصلش وفى ناس بيقولو ان الحشيش اتصدر المانيا عشان التخدير بتاع العمليه اياها وانا حاسس انهم عيزين يغلوه والحكومه هترفع الدعم عنه انا خلاص مسافر افغانستان وهروح اتكيف فى مخانات تورا بوراانا ومؤمن ال عايز يجى

انا مش هشرب بانجو ولا برشام وكمان الخمره حرام

مفيش كلام على لسان الشباب غير ان مفيش حشيش فوقو بقى الاقصى فى خطر

احترس من الفله الحمرااااااااااااااااااااا
شجع صناعه بلدك واشترى المصرى وحافظ على صحتك
والله الواحد اطمن قوى لما شاف التحذير الجديد ال على علب السجاير التحذير ده طبعا لاصحاب الفله الحمرااا
وانا بقول لمدخن الكليوبترا ارفع راسك وبقول لزوات الفلل الحمرااا احترس وبطالب وزاره الصحه انها تشيل التحذير ده من على العلب الكليوبتراا لانه مش موجهه لينا

الثروه السماكيه والحراميه ولاد المؤذيه

مسعد: اهو جاى من بعيد والصناره فى ايد والمرجونه فى ايد ومش هقول ولا اعيد على صياد بورسعيد بارك وصلى ع النبى الحموله تزيد جاى خفيف بس السمك ع الربع نقل اكيد وسع اجدع
ابو العربى : بس يا مسعد
مسعد : متخفش من الحسد يا ريس خمسه كيلو فى خمسميه وربنا يبعد عننا الحسوديه
ابو العربى : بس يا مسعد
مسعد :الكل هياخد الى عايز غطيان وابو كرش المليان والبربونى والصيجان
ابو العربى : بس بقى يلعن ابو امك هات الميكرفون اءيهىء اه
الجمهور : مالك يا ريس فى ايه يا ابو العربى طمنا عليك
ابو العربى : انا من الاف السنين بصطاد ايام ما كان البحر فيه خير لما كان البحر فى شارع الثلاثينى لما كونا بننزل نجيب السمك بادينا وكنا بنتعامل معاه بلغه الاشاره وكنا ناخد الكبير ونرمى الصغير وكان فى معاهده والكل بيرزق دلوقت حتى النورس مش لاقى ياكل واهل بورسعيد بيرمولو عيش من المعديه

البمبوطى : تلوث يا ابو العربى

ابو العربى : لا يا ابن عمى
حرميه الزريعه يا بمبوطى ( كل يوم الساعه 6 الصبح بيطلعو على عربيه ربع نقل هتلقيهم فى صندوق العربيه 4 يمين واربعه شمال والقارب فى النص وعلى عينك يا حكومه )

الحكومه بتعمل كده عشان تحرجنى قدمكم واكنى مش هقدر احمى السمك فى الميه

مسعد : حتى السمك فى الميه بيقول ابو العربى ميه ميه

حرميه الزريعه بيبيعو الزريعه لمزارع الاسماك

احنا لازم نقف للحرميه دول وقفه رجل واحد

ونقطع لسان مسعد

خطاب سرى لاوباما

الف مبروك للشعب الامركانى والف مبروك يا اوباما

عايز اقولك تاخد بالك بوش عليه سنه نور مدفعهاش وميه وفى تلفيات فى الحمام الى تحت فى البيت الابيض ولمبه محروقه فوق فى غرفه المعيشه وانت عشان تهمنى ولسه جديد يا ولدى خايف عليك لتلبس كل الحجات دى عاين البيت الابيض واسئل فى الاناره وشركه الميه

وبالنسبه بردو فى وصل امانه على بوش الكلب ليا انا السيد ابو العربى بس ممضى برئيس جمهوريه امريكا فخليه يدفعو قبل ما تمسك انت رسمى احسن وحيات امى مش هعرفك وهاخد حقى يعنى هاخد حقى

ووحيات ابوك حسين يا اخى وبوش بيلم عزالو لتقولى عشان اجى عند البيت لالبيض انا وام العربى والعيال ونكسر وراه قله ونجرسه

ملحوظه

فى داير حمام وعشه فوق سطح البيت الابيض ارجو الحفاظ عليهم

والسلام ختام

حافظو على القوميه البورسعيديه

حافظو على قوميتكم البورسعيديه 1

بتحبو بورسعيد ؟؟؟؟؟؟؟؟؟سامع ناس كتير بتقول اه بس مش بتعصب فين العصبيه البورسعيديه والله يا اخوانا فى هجمه شرسه على ثقافتكم و اصلكم... شباب بورسعيد بقى بيتحرج بقى بيعوج لسانه وكل ده عشان ال ايه اللغه بتعتنا عايز اقول للشباب ده عيب عليك لازم تبقى فخور وتتكلم بورسعيدى كل بلد وليها ثقافتها مش عيب يكون لينا لهجه وطبعا لهجتنا بتثبت اننا الاصل عندك مثلا بنقول( اسرج النور) وهما بيقولو ولع وايد ... يا ابنى اسرج دى جايه من سراج احنا كان عندنا سراج وهما عندهم شمع ولمبه جاز يبقى الاحسن ايه و الارقى والانضف ايه تتحرج من ايه متبقوش شباب تيكى ميكى بيروح ويجى شباب نص كم مينفعش غير فى الصيف والشتاء لاء ولو محفظتوش على كلامكم ولغاتكم انتو حورين هتندسرو وبطلو تقليد اعمى للغرب

ونصيحه لكل اب عنده بنات فى سن الزواج

احترس من زواج ابنتك الغير بورسعيدى فى تنظيم ومحاولات مستميته من قوى خارجيه ( دمياط واسماعليه ) عيزين يتجوزو بنتنا وينولو حته فى ارضنا ويخدو جنسيتنا فين اهل بورسعيد الابطال وتقول اصله معاه شقه ومقتدر يا اخى فين المثل الشعبى المعروف ملعون ابو القرش الى مينزه صحبه ...وكمان المثل التانى يكلها تمساح ولا يخدها فلاح وادينا شايفين البنات الى تجوزو من بره بورسعيد جابو ثقافه عامله اذاى وولدهم عاملين اذاى... وبردو كل شاب يا ابنى خد بورسعيديه حتى لو عندها تخلف عقلى اكرملك ما تاخد بنت غريبه عن مجتمعنا وثقفتنا وعشان سهوله التعامل معاها حتى فى اللغه وتربيه ولادك تخيل ابنك يطلع يقولك ولع ولا ايد النور يا لاهوى يا للعار

وسلملى على العنصريه
مسعد :: هنشيلك فى عنينا يا خايف علينا .. تيت تيت تيت بنحبك يا بورسعيد .. ولا دمياط ولا اسمعليه بورسعيد هى الاصليه حط ايدك فى ايدى واتجوز بورسعيدى ..